Korriku i 2019 muaji më i nxehtë në historinë e njerëzimit, pasojat do jenë drastike

Gjatë stinës së verës këtë vit u shënuan temperatura të larta pothuajse në të gjithë botën. Në shumë vende i nxehti ekstrem mori edhe jetë njerëzish.

Kujtojmë këtu se fillimisht nga vala e të nxehtit ekstrem fillimisht u prek Europa dhe kryesisht shtete si Franca, Britania e Madhe, Çekia, Austria dhe Gjermania.

Por nuk ishte vetëm “Zonja e vjetër”, që u prek nga temperaturat e larta pasi edhe në Shtetet e Bashkuara të Amerikës dhe Kanada u shënua temperatura ekstreme.

Ditën e djeshme ka qenë Agjencia Atmosferike Amerikane NOAA, ajo që pohoi se muaji i korrik i vitit 2019 ka qenë muaji më i nxehtë në botë i regjistruar ndonjëherë dhe se pasojat që do të vijnë do të jenë drastike.

Në një deklaratë të kësaj agjencie thuhet:

Pjesa më e madhe e planetit ka njohur një nxehtësi të paprecedentë në korrik, me temperaturat që arritën nivele rekord gjatë muajit më të nxehtë të regjistruar ndonjëherë. Për shkak të nxehtësisë rekord është reduktuar edhe akulli në detet e Arktikut dhe të Antarktidës në nivelet më të ulëta historike.’’

Reduktimi i akullit në detet e Arktikut dhe të Antarktidës në nivelet më të ulëta historike është një problem mjaft shqetësues.