Teksa jemi në kulmin e sezonit turistik, Shqipëria vijon të përballet me probleme të shumta në turizëm.
Janë të shumta rastet e denoncuara në media, ku dëshmohet qartë se ky sektor nuk po funksionon siç duhet.
Që nga faturat e kripura në restorantet pranë bregdetit, të cilat kanë bërë që vizitorëve që i frekuentojnë t'u ngecë ushqimi në fyt, e deri tek cilësia e dobët e shërbimit, që në të shumtën e rasteve lë shumë për të dëshiruar.
Një nga problemet kryesore me të cilat përballet turizmi në vendin tonë është shërbimi që ofrohet nga hotelet dhe shtëpitë e pushimit.
Lidhur me këtë, JOQ Albania ka kryer një sondazh në rrjetin social "Facebook", ky shqiptarët u pyetën nëse janë të kënaqur me shërbimet që ofrojnë hotelet dhe shtëpitë e pushimit.
Pjesa dërrmuese e shqiptarëve që i janë përgjigjur sondazhit, rreth 80%, janë shprehur se nuk janë të kënaqur nga shërbimet e ofruara, duke përforcuar më tej faktin se turizmi në Shqipëri ka probleme shumë të mëdha, të cilat duhen zgjidhur.
Ndonëse propaganda boshe e qeverisë thekson që shërbimet në sektorin e turizmit janë cilësore dhe konform standarteve europiane, fakti që shqiptarët nuk janë të kënaqur, tregon qartë si qëndron e vërteta.
Parimisht, qëllimi kryesor i një hoteli apo restoranti duhet të jetë cilësia, në mënyrë që klientët të jenë të kënaqur me të gjitha shërbimet e ofruara.
Por fatkeqësisht duket se jemi ende larg, pasi rezultati i sondazhit tregon të kundërtën.