Drejtoria e Përgjitshme Italiane e Antidrogës ka publikuar raportin vjetor për të dhënat e trafikut të drogës në Itali për vitin 2018.
Sipas këtij raporti, Shqipëria rezulton të jetë furnizuesja kryesore e Italisë me marijuanë, ndërsa shqiptarët përbëjnë numrin më të lartë të të arrestuarve të përfshirë në trafikun e drogës.
Vetëm gjatë vitit 2018 në prangat e karabinierëve kanë përfunduar 1917 shtetas shqiptarë, ndërkohë që është vënë re një rritje e numrit të femrave dhe minorënëve të implikuar në trafikun e lëndëve narkotike.
Më poshtë pikat kryesore të raportit në lidhje me Shqipërinë:
– Shqipëria, përmes detit Adraitik, është kanali kryesor furnizues për Italinë dhe vendi i origjinës i sasisë më të madhe të marijuanës së sekuestruar gjatë këtij viti.
– Në total në vitin 2018, antidroga italiane ka sekuestruar rreth 14,2 ton marijuanë. Sasia e marijuanës së sekuestruar që vinte nga Shqipëria është rreth 6.3 ton, ose sa 44 për qind e sasisë totale të sekuestruar.
– Grupet kriminale shqiptare që merren me trafikun e marijuanës në Itali janë të vendosura kryesisht në rajonin e Puglias e Campagnas.
– Vitet e fundit, bandat shqiptare po përfshihen dhe në trafikun e kokainës. Ato e trafikojnë kokainë nga Spanja e Holanda, dhe më pas e shpërndajnë në të gjithë Italianë.
– Për trafikimin e heroinës, bandat shqiptare po bashkëpunojnë me mafian napoletane Camorra.
– Nga Shqipëria e Greqia trafikohet në Turqi sasi të konsiderueshme droge e njohur me emrin SKUNK, një derivat i kanabisit mjaft i fuqishëm.
– Në 2018-ën, në Itali janë arrestuar 1917 shtetas shqiptarë, të akuzuar për trafik lëndësh narkotike, ku pjesën më të madhe e zënë të arrestuarit për trafik kokaine: 1282 shqiptarë, ose 66 për qind, janë arrestuar për trafik kokaine; 418 shqiptarë ose 21 për qind janë arrestuar për trafik marijuane, 167 shqiptarë ose 9 për qind janë arresuar për trafik heroine.
– Mes shqiptarëve të arrestuar për trafik droge vihet re rritje e numrit të femrave dhe fëmijëve minorenë.