Çmimi i lartë i karburanteve po "tkurr" çdo ditë e më tepër xhepat e shqiptarëve.
Jo të gjithë qytetarët janë në dijeni të faktit se mbi çmimin e karburanteve paguajnë plot 8 taksa.
Për çdo litër naftë që shitet në treg, qeveria shqiptare mbledh 37 lekë akcizë, 27 lekë taksë qarkullimi, 3 lekë taksë karboni dhe 7 deri në 10 lekë taksë riliencimi.
Pas këtyre, vijnë dy taksa të tjera, e markimit dhe e skanimit, që përfundojnë në xhepat e koncensionarëve privatë. Këto dy taksa së bashku shkojnë në 3 lekë për çdo litër karburant.
Gjithashtu kohët e fundit përflitet se do të shtohet edhe një tjetër taksë që do t'i bashkangjitet dy tarifave private. Bëhet fjalë për taksën e kontrollit të pompave, e cila deri më tani mblidhej nga drejtoria e metrologjisë.
Por kontrolli i pompave tashmë do të jepet me koncesion, që do të thotë se kjo taksë do të përfundojë në llogari të kompanisë private.
Dhe pas katër taksave shtetërore dhe tre private, "ëmbëlsira" vjen për në fund; Tvsh-ja ose tatimi mbi vlerën e shtuar, e cila përbën 20% e të çmimit final, ose thënë ndryshe 30 lekë për çdo litër naftë.
Dhe sipas llogarive, fatura finale që një qytetar shqiptar duhet t'i paguajë shtetit, por edhe koncesionarëve privatë për çdo litër naftë është plot 112 lekë.
Duke marrë parasysh situatën ekonomike në vend dhe të ardhurat mesatare për frymë, kjo shifër mund të konsiderohet "stratosferike", e cila rëndon më tej xhepat e shqiptarëve.
Nëse bëhet një krahasim mes fuqisë blerëse të qytetarëve, Shqipëria konsiderohet si vendi me çmimin më të shtrenjtë të karburantit në botë.