Është zbuluar firma, që do të rindërtojë Bulevardin Zogu I në kryeqytet.
Bëhet fjalë për firmën "Fusha Shpk", e cila do të rikonstruktojë segmentin rrugor prej 600 metrash, nga Sheshi "Skënderbej" tek ish-Stacioni i Trenit.
Kostoja e rindërtimit të kësaj rruge do të jetë 5 milionë Euro ose thënë ndryshe 8200 Euro për metër.
"Fusha shpk" është një kompani e njohur në kryeqytet, pasi vetëm në 4 vitet e fundit ka përfituar mbi 40 milionë Euro tendera publike.
Bazuar në këtë konstatim, mund të thuhet se "Fusha shpk" është "fituesja e përhershme" e tenderave të ndërtimit në Tiranë.
Për të fituar tenderin e rikonstruktimit të Bulevardit "Zogu I" konkuruan katër kompani, ndërkohë që "Fusha shpk" paraqiti ofertën më të ulët, rreth 5 milionë Euro.
Duket kosto shumë e lartë për reahbilitim rruge urbane, afërsisht 8,5 milionë euro për kilometër.
Sipas "Exit.al", kostoja për rehabilitimin e kësaj rruge urbane, duket relativisht e lartë, pasi bazuar në përllogaritje i bie që rikonstruktimi i 1 km rrugë të kushtojë 8.5 milionë Euro.
Ky projekt i kushtueshëm u hartua mbi një studim të studios "I RI", që kushtoi rreth 90 mijë Euro.
"I RI" është në pronësi të firmës "51N4E", e cila është klienti kryesor i Kryeministrit Rama.
Kujtojmë se "51N4E" projektoi edhe rindërtimin e Sheshit "Skënderbej", të realizuar po nga Fusha shpk.
Edhe pse studimi prej 124 faqesh nuk e ofronte planin e plotë të projektit, Bashkia duket se nuk e ka vënë asnjëherë në diskutim idenë e rindërtimit të këtij segmenti rrugor.
Bulevardi Zogu I u rindërtua në vitin 2006 kur Kryetar i Bashkisë Tiranë ishte kryeministri Rama.
Ndërkohë dy vjet më parë, kryebashkiaku aktual, Erion Veliaj, ndërhyri në këtë segment duke kthyer në korsi për biçikletat trotuaren e këmbësorëve në mes të dy krahëve për makina të bulevardit, investim që tani mesa duket do të zhbëhet.