Qeveria ka shpallur kompaninë "Noa Control" fituese të koncesionit të pompave të naftës.
Sipas ish-deputetit demokrat, Agron Shehaj, procedura ishte e jashtëligjshme, pasi kishte vetëm një ofertues.
Më tej Shehaj zbulon se tenderi është bërë në fshehtësi të plotë dhe si pasojë e ankesave, gjykata ka kërkuar modifikimin e kritereve të garës.
Kontrolli i pompave të naftës është një aktivitet fitimprurës, i cili më parë kryhej nga shteti. Por kompania në fjalë sqaron deputeti, do të investojë vetëm 600 mijë euro dhe për 20 vjet do të përfitojë 100 milion euro minimalisht, nëse do të vijohet me tarifa të njëjta.
Shehaj i ka bërë thirrje prokurorisë që të hetojë këtë aferë korruptive gjigante.
Postimi i plotë
Nëpërmjet një procedure konkurimi me një ofertues dhe të jashtëligjshme, qeveria ka shpallur kompaninë “Noa Control” fitues të koncesionit për kontrollin e pompave të naftës. Ky tender është bërë në fshehtësi të plotë, si pasojë e ankesave për fitues të parapërcaktuar gjykata ka kërkuar modifikimin e kritereve të garës. Kontrolli i pompave të naftës kryhej nga shteti dhe ishte një aktivitet fitimprurës sepse sillte në arkat e shtetit mbi 5 milionë euro në vit. Kompania “Noa Control” do të investojë vetëm rreth 600.000 euro dhe nga koncesioni njëzetvjeçar, do të përfitojë minimalisht 100 milionë euro, nëse tarifat e kontrollit do jenë të njëjta. Vjedhja nëpërmjet këtij koncesioni është marramendëse dhe kjo është arsyeja pse fituesi i garës së këtij koncesioni ishte i parapërcaktuar. I bëj thirrje Prokurorisë të hetojë këtë aferë korruptive flagrante në shkelje të ligjit.
