Resul Miklaev është rusi, i cili është arrestuar në Shqipëri si pjesë e grupimit terrorist të Jaish al Muhaxhirin al Answar, pjesë e shtetit islamik ISIS.
Ai ka dalë para gjykatës së Durrësit, ku ka kërkuar të mos dorëzohet në Rusi, pasi i rrezikohet jeta, ndërsa ka thënë se ka krijuar një organizatë për të mbledhur ndihma për viktimat e luftës në Siri.
Teksa rusi shprehet se nuk është terrorist, provat tregojnë se 34-vjeçari që qëndroi për 11 muaj në një dhomë të qendrës së Kareçit, ka udhëtuar në vitin 2013 nga Rusia në Turqi dhe mandej në Siri, ku në qytetin Kharitan i është bashkuar njësisë së armatosur të organizatës terroriste.
Rasul Miklaev, 34 vjeç, një person i kërkuar si terrorist prezantohej përpara stafit të Kareçit si Diego Maradona. Vetë stafi dhe punonjësit e policisë kufitare ia kishin vendosur emrin X , ndërsa njëkohësisht të huaj dhe agjentët e antiterrorit të bindur se bëhej fjalë për një terrorist, vazhdonin të komunikonin me ndërkombëtaret dhe tu kërkonin shenjat e gishtave, mëson TCH.
Ajo që e tradhtoi Rasul Mislaev nuk ishte karakteri i tij i çuditshëm apo fakti që qëndronte i mënjanuar nga të tjerët, por e tradhtoi një telefonatë, e cila i çoi autoritet shqiptare në një komunikim të vazhdueshëm me Rusinë, që nga ana e saj konfirmoi se ky shtetas ishte me kartelën ‘red notice’.
Rasul Miklaev për 11 muaj ka dhënë disa identitete dhe identifikimi i tij ka angazhuar disa agjenci ligjzbatuese dhe inteligjente.
Kur ai mbërriti në Shqipëri verën e 2018 së bashku me një grup emigrantesh që vinin nga lufta, u shtir si një person që as dëgjonte dhe as fliste.
Por roli i tij mori fund pikërisht këtu në qendrën e mbyllur të Kareçit, pas intervistimit dhe dyshimit se në fakt nuk bëhej fjalë për një person që përpiqej t’i shpëtonte luftës, por bëhej fjalë për një person të rrezikshëm dhe terrorist.
Për këtë arsye për 11 muaj me radhë, ai u mbaj nën vëzhgim por edhe u pyet shpesh ku u thye dhe vendosi të flasë. E megjithatë, Miklaev asnjëherë nuk e tha emrin e tij të vërtetë dhe as identitetin.
Madje edhe të tjerë të ardhur nga vendet e luftës që vazhdojnë të mbahen në qendrën e Kareçit, nuk e njohin me emrin e tij, por me identitetin që ai është prezantuar.
